Анаіс Марэн: словы польскіх уладаў пра тое, што сытуацыя з правамі чалавека ў Беларусі палепшылася — невуцтва або цынізм

У сваім артыкуле Анаіс Марэн напісала, што да яе часта зьвяртаюцца грамадзяне Беларусі і просяць паўплываць на ўлады Польшчы, якія апошнімі месяцамі рэзка павялічылі колькасьць адмоваў беларусам у наданьні прытулку, адзначае Радыё Свабода.

Паліталягіня мяркуе, што высланьне беларусаў, якія зьвяртаюцца па міжнародную абарону ў Польшчы, у родную краіну зрабіла б Польшчу саўдзельніцай сур’ёзных парушэньняў міжнароднага і эўрапейскага права ў гэтай галіне. Яна засьцерагла афіцыйную Варшаву ад падобных крокаў, нагадаўшы, што такіх людзей на іхнай радзіме могуць чакаць вялікія тэрміны зьняволеньня і катаваньні.

«Беларусам, якія жывуць у Польшчы ўжо некалькі гадоў і якім адмаўляюць у падаўжэньні дазволу на жыхарства або міжнароднай абароны, кажуць, што ім «трэба было раней падаць заяву на прытулак», што яны «нязначныя апазыцыянэры» або «ня вельмі актыўныя».

Некаторыя з прыведзеных апраўданьняў — напрыклад, сьцьвярджэньне, што сытуацыя з правамі чалавека ў Беларусі палепшылася (выбары адбыліся ў 2025 годзе, былі вызваленыя палітычныя зьняволеныя) — можна растлумачыць толькі невуцтвам або цынізмам», — піша Анаіс Марэн.

У Беларусі працягваецца праца КДБ супраць грамадзян, якія ўдзельнічалі ў пратэстах або крытыкавалі ўлады, пасьля сэрый вызваленьняў палітычных вязьняў у краіне працягваюцца затрыманьні, арышты і палітычныя суды.

Таксама яна адзначыла, што беларусы, вымушаныя пакінуць краіну, адчуваюць сябе паміж молатам і кавадлам. Краіны, якія іх прымаюць, пачалі ставіцца да іх больш падазрона — і вінаватыя ў гэтым гібрыдныя атакі палітычнага рэжыму ў Беларусі. Выкарыстаньне гэтым рэжымам мігрантаў з трэціх краін з 2021 году абвастрыла антыіміграцыйныя настроі. Гэта адчуваюць на сабе і беларусы ў Польшчы.

Марэн падала статыстыку, паводле якой у першай палове 2026 году ўлады Польшчы часьцей адмаўлялі беларусам у прытулку, чым давалі яго.

«Як і ў іншых частках Эўропы ў гады выбараў, ультраправыя ідэі набіраюць абароты, і нават добра інтэграваныя імігранты, такія як беларусы, якія робяць значны ўнёсак у польскую эканоміку, цяпер робяцца ахвярамі такіх падыходаў».